سلام أنا متحصلة على باك 2022 بمعدل 18.72 الأولى في ولاية عنابة على الأحرار الله يبارك ♥️🙏✨
كاين ناس قتلي أحكي على تجربتك و انا في الخدمة. أولا تحصلت على معدل 16 و موصلتش للطب فقررت اني نعاود الباك أول حاجة درتها حكمت كشف النقاط تاعي و بديت نشوف في واه راني طايحة و كانت علوم بطبيعة الحال فابتكرت طريقة تمكنني من التمكن من العلوم : أولا نقرا الوحدة كاملة نظريا من اليوتوب و إلا من القسم أو من ليكور المهم من عند أستاذ كفء و مبعد كي نكمل الوحدة نراجعها مليح و نحفظ كاش مفاهيم و لا حوايج خفاف و مبعد ننتقل للتمارين كنت نحل البكالوريات من 2019 الى 2021 و مواضيع اللي يحطهم عقبة بن نافع و تمارين الأستاذة جلامدة ( عندهم صفحة فالفايس) و السر في حل التمارين اني كنت نحل التمرين مبعد نصححو بالتصحيح النمودجي و مبعد كي نكمل التمارينات تع الوحدة اللي كملتها نعاود نراجع الوحدة و نراجع بعض التمارين اللي حليتهم من قبل و استفدت منهم نراجعهم بالتصحيح النموذجي هاد الطريقة خلاتني نتمكن من المنهجية و كل مرة نتعلم فكرة جديدة .بكل بساطة العلوم هي حل تمارين ممنهجة و التمكن منها و اتقانها يكون بالممارسة خاصة الوحدات الصعاب كيما الإنزيمات و المناعة و المشبك. بالنسبة للرياضيات كنت نقرا الدرس عادي عموما من عند الأستاذ نوردين و شريت الكتب تاعو كل محور نحل مجموعة من تماريناتو اللي هوما بكالوريات بصح التصحيح تعهم نموذجي تسما كل ما تحلو تتعلمو. أما فيزياء كيفكيف نقرا الوحدة مليح و نراجعها و حليت غير البكالوريات في الشعبتين علمي و تقني و ساعات نحل مواضيع تع عقبة بن نافع و ادا كان عندي نقص في حاجة معينة كنت نتبع زدون و أحمد ترير و في المراجعة النهاءية ركزت على النظري في الفيزياء و على القوانين. عربية مادة مهمة خلاه لازم تمدولها من وقتكم كنت نقراها مرتين في الأسبوع لمدة 3 ساعات نقرا المحور مليح و نحفظ الخصاءص و الرواد..ومبعد نحل مواضيع الباك السابقة و نصحح ديما أخطاءي مقارنة بالتصحيح النموذجي تبعو حيقون و حماش راهم روعة. الإنجليزية لازملها مراجعة تع قواعد بالخصوص و تطبيق على البكالوريات و الفقرات جيبوهم من كتاب تع الأستاذة فرني أو ب 10 الاف فيه وش تحتاجو كامل و الأستاذ ناصري تانا مليح أما الفرنسية أقراو كل أنواع النصوص و أحفظو كلماتهم الأساسية و تمرنو على compte rendu و حاولو طلو على البكالوريات. إسلامية أحفظو من عند بوسعادي و في الأخير تبعو سعدون شعيب فاليوتوب يدير أسءلة الفهم و حلو البكالورياتو جاوبو بطريقة ذكية للأنو مبقاتش غير حفيظة . إجتماعيات أحفظو من بورنان و ادا مشكم فاهمين الدرس تبعوه فاليوتوب هو ولا قنشوبة و مبعد في المراجعة النهاءية اتعلمو منهجية الإجابة و طلو على البكالوريات✨في الأخير ادا حتعڨب حر و إلا نظامي سر تع الباك هو الإجتهاد و الدراسة الذكية يعني تعرف وش تقرا على حسب وش ناقصك في كل مرحلة و على حسب التخصص الي نتوما حابينو متخليو حتى واحد يعرقلكم و إلا يقولكم متقدروش توصلو و حاولو ديما تكونو ايجابيين و أقراو من أول العام و أهم حاجة متخليوش الخوف يتحكم فيكم و بإذن الله كي تأمنوا بأنفسكم و بربي سبحانو رح توصلو ♥️