تخصص صيدلة
منقول عن طالبة تخصص صيدلة
السلام عليكم ،بما انوا طلبة الباك محتارين في اختيار التخصص قلت علاش منحكيلكمش شوي على تخصصي الصيدلة بالاك تدوا فكرة او على الأقل تصحح المغالطات راح يكون شوي طويل لاني راح نحكي بالتفصيل الممل.
تخصص الصيدلة 701
معدل القبول 2020
15.78 علوم تجريبية
16.24 رياضيات
16.74 تقني رياضي
طريقة التدريس و المدة
في الصيدلة نقراو 6 سنوات, 5 في الجامعة والسادس سنة تربص وتحضير مذكرة التخرج
في السنة الاولى عندنا :
Chimie ( général , organique) , anatomie ,phisyology , biologie ( cellulaire , végétale ) , histoire de pharmacie ,w language étrangère,(bio math , biostat ,informatique)
السنة الثانية :
Chimie (menirale , analytique ) , biophysique , botanique ,pysiphatologique , génétique , biochimie , culture générale
السنة الثالثة :
Pharmacie chimique , pharmacie galénique ,farmacognosie, chimie analytique , pharmacologie, sémiologie médical
السنة الرابعة :
Parasitologie ,immuno,humobio, biochimie , microbiologie
السنة الخامسة :
Gestion pharmaceutique , droit pharmaceutique , toxico ,épidimino ,bromato
السنة السادسة :
تكون عبارة عن تربص
في المصلحة العيادية شهرين
في الصيدلة شهرين
في الصناعة شهرين والباقي تكمل فيهم مذكرة التخرج
بعد هنا تتخرج كدكتور في الصيدلة docteur en pharmacie
هنا تولي عندك فرصة العمل في صيدلية ،ولا تخدم فلوبيتال ،تقدر تكون مندوب مبيعات صيدلانية (déligué médical )....
وبعد اللي يحب يكمل التخصص ويجوز الريزيدانا هنا في الجزائر المفروض كاين
-Spécialités pharmaceutiques :
واللي هوما 10 مدة الدراسة فيهم 4 سنوات
-Spécialités fondamentale :
5 مدة الدراسة فيهم 5 سنوات
بعدها تولي قادر تفتح اللابوا نتاعك ،وتقري في الجامعة كدكتور
في دراستها الصيدلة حلوة بزاف ، وتشتمل على بزاف مجالات ،راح تسمع اللي مفيهاش مناصب عمل ،مكاش في دزاير حاجة مضمونة ، هو المشكل الوحيد فيها الاعتماد صح اصبح شبه مستحيل الحصول عليه بصح مش معناها مكاش فرص للعمل فيها بالعكس كاين الاف الفرص تعتمد عليك وعلى شطارتك
في الاختيار متحطهاش علاجال مكانتها في المجتمع والا ملحقتش وش راك حاب دير صيدلة ،لا راهي تحتاج حب وصبر واذا حبيتها صح راح تتميز فيها هاذا الشي الاكيد
واتأد انوا في نهاية الامر دائما الخير فيما اختاره الله ،وان كل انسان رزقه مكتوب الانسان فقط عليه السعي
وفقكم الله لما فيه خير
إضافة من طالبة تخصص صيدلة
قرايتها مليحة و تحتاج صبر أيوب. الواقع يقال، هي أحسن من الطبيب برك كي يفتح، شغل لي حاب يضمن المستقبل تاعو، و منكذبوش على ارواحنا، مام و يكون الشخص حاب التخصص و طموحو بالدرجة الأولى، لازم يكون في نفس الوقت يضمنلو المستقبل من الناحية المادية. ساو وش نقلك، عندي الأخ تاعي دار الفارماصي ملي كانت هي المرتبة الأولى قبل الطب عام 2010، قرا خمس سنوات وين كان العام السادس تاع being a doctor مش مشروط، المهم الأخ طلع و هبط من لي تخرج و راهو مازال مالحقاتوش الموافقة و الدور تاع أنو يفتح. و فيها الخدمة في السبيطارات، و لكن هيهات هيهات باش يصحلك منصب. يعني مزال مفهمتوش علاش المعدل تاعها طاح ؟ خمموا شويا. و نزيدكم راهم طلبوها كاقتراح باش يحبسوها سنوات نظرا لعدم توفر مناصب العمل فيها. يعني لي حاب يقراها الآن يقراها كطموح و كأنوا يكون صيدلي. و لي جابوا الباك من 2012 و قبل راهم شوي عندهم آمال أما غيرها غير يستناو الدهر كامل و ميفتحوش مع الشروط الجديدة لي راهم بصدد تطبيقها.
توضيح من طرف صاحبة تخصص
هناك خطا فرص العمل غير متوفرة نحن نعاني من البطالة حوالي 7000 صيدلي او اكثر يعاني البطالة ادخلو لقروب تاع الصيادلة
تعرفو بلي القطاع راه يتخبط في مشاكل
نعم هناك صعوبات اول شيء عدد المترشحين لامتحان التخصص كثير جدا مقارنة مع عدد المناصب وتوفر التاطير فمثلا في علم المناعة يوجد في الغرب في وهران فقط يعني قسم واحد لتاطير المتخصصين في جميع السنوات
من يملك معلومات عن التخصص يتفضل في التعليقات
وفقنا الله وإياكم إلى كل ما يحب و يرضى